Natal Nane Hanaf Alekot (Matius 1:18-25 (Renungan Uab Meto)

Bae benu manekat, mabe’ i, lais malinat mese neukit oke-oke, natuin Uis Neno in manekan talan tia hit tabua he tamnau Usif Yesus in Neno Mahonit le’ hit takanab tak Natal. Anbi hit kuan, hit takanab Paok Pina.

          Hit oke-oke at malin natuin lasi nahonis Usif Yesus nane hit tanaoba nok malinat a’naek. Lasi malinat nane nahum on at mo’e hau klima nok ninik ai paku le’ in a’ koton huma-huma. Taloitan hit ume mese-mese, atsos sabalu fe’u ai at mo’e kokis aminat. Muni’ le’i, munif sin an mo’e a’ba’e mese na’ko kota’ naek, in kanan ‘kembang api.’  Atsimo hit aok bian an bi hit ume mese-mese ma at mana’ nim es nok es. Lasi i ka nsanaf. Natuin hit atkiso na’ko hit amnasit sin ai na’ko tuaf bian le’ an mo’e lasi mnaut neo neno mahonit Usif Yesus ai Natal neki mo’et onane. Ka nmu’if talas he tanaoba Natal nok mo’et-mo’et nane. Meski nak onane, hit so’ tamnau tak lasi Natal, ai lasi tamnau Usif Yesus in Neno Mahonit Nane ka nmatom fa nok lasi-lasi pah pinan. Hau klima’ nane lasi pahpinan ini. Paku le’ a’koton huma-huma, lasi pahpinan ini. Taloitan hit bale tuas nane msa’ an matom nok hit monik anbi pahpinan i. Sa’ anteni tanaoba lasi-lasi bian onle slutuf le’ nale’un lasi a’tena’ an bi hit kuan. Nane nahum on lasi mansian ini nbi pah pinan.

         

Leka onane, a’teb hit naik at mo’e lasi-lasi nane ka? Ka nmu’if talas. Mes hit so’ tamnau, tak lasi honit Usif Yesus Nane an matom nok lasi smanaf in ini.

          So’it a’an Knino naton kit, nak bi Maria bife munif mese, in an mafutu nok atoni mese in kanan Nai Yusuf. Maski nak sin fe ka nmonin fa on fel ma mone, bi Maria na’apu nahun. Aput nane natuin kuasat Smanan Knino ma ka na’ko fa mansian. Lasi i anfani lasi ‘taka mese. On me talan te bife na’apu mes ka na’kofa in mafutus nok atoni? Lasi ‘taka le’i he an etu ma naton kit nak nahonis Usif Yesus nane ka lasi laf-lafu fa. Nane lasi mkakat mese le naton kit nak hit Uis Neno le’ nane an mepu lasi mkakat. Lasi i amsa he an etu ma naton kit nak natuin Uis Neno an nek mansian talan tia in an mo’e lasi mkakat nane he nati namonib kita ta’ko hit sanat sin. Es nane in kanan Yesus (Matius 1:21).

          Nahonis Usif Yesus nane an fani lasi taka mese nak mansian asanat sin of napeni honis. Lasi le’i so hit tatenab leko-leko. Hit mansian le’ atmoni tbi pahpinan le’i tasanab oke-oke (Roma 3:23). Sekau es he nafetin kit na’ko sanat. Katitfa es. Ala kanaf Yesus, fun Usif Yesus of an soi kit na’ko hit sanat sin (ela 21). Kalu onane. Lasi Natal ka nmatom fa nok lasi mlila natuin meput pahpinan. Lasi Natal nane an matom nok Uis Neno in mepu hen soi kit na’ko hit sanat sin. Kalu nak mansian na’ko ton es antam neu ton bian nanaoba Natal mes in ka nahinfa nak Natal nane an matom nok lasi honis anbi Usif Yesus, mansian le nane in nanoba Natal palsum. In nanaoba Natal ala he naton in mo’et ma ‘mu’if pahpinan. So’ mak alkit mabe le’ i at be’ ma tahin tak Natal le’ nane an matom nok lasi honis, natuin Usif Yesus ansanu nem he an sako hit sanat sin.

          Ai hit atmo’e sanat sa le maneun le’uf anbi hit monik, ka? Natal neki hanaf alekot. Yesus of an sako hit sanat sin oke-oke. So’ mak hit tahelan hit lasi palsait, ma ta pesit hit monik piut teu kanaf Yesus.

          Bae benu manekat. Lasi malinat Natal nane amsa an matom nok lasi Uis Neno Nokan kit. Ela bo’ nuam teun an etu ma naton kit nak lasi nahonif Usif Yesus nane antui nani anbi sulat knino uab Ibrani. Mansian of an tek nani Usif  Yesus nak Imanuel. Imanuel le nane in oten nak “Uisneno nok kit.” Le’i hanaf alekot neu kit oke-oke. Mansian le’ an moni nmes non nbi pah pinan le’i so’ mak namlil nai, natuin Natal fun anbi Natal le’i Uis Neno Nokan Kit. In ka nasaitan kit fa.

          An mu’i mansian le natenab nak in monit anbi pah pinan le’i ka ma upa’ fa. Nansa? Nantuin in natenab nak in an monin mes non. Bife banu’ le in mone an maet nasaitan oni anmu’i tenab nak in monin mes non. Li an manat le kan mu’if amnasit sin of natenab nak sin nmonin mes nok. Amnasit le in anah ka nem nit fa he nkiso, of natenab nak in nmonin mes non. So’ mak hit tamnau nai. Natal le nane, han alekot neu kit oke-oke. Hit ka tmonif on li’an manat. Uis Neno of nok kit. Masti nak hit atmeput mes nok. Masti nak hit tatua tmes nok. Meski nak hit kat mu’if es he nok kit. Natal hen fe kit hanaf alekot. Uis Neno mes Nokan kit, Imanuel.

          Lasi nono nua le’i so’ mak hit tetenab leko-leko. Natal le nane hanaf alekot neu kit nak (1) Usif Yesus of ansako kit ma namonib kit na’ko hit sanat sin, ma (2) Usif Neno ka nasaitan kita fa. In of nokan kita piut-piut talan tia nabal-bal. Amin.

Mu’ Up ho Amnasit Sin (Matius 1:1-17) Renungan Uab Meto

Bae benu manekat anbi Usif Yesus, nahunu na’ko au he utiaba A’an Uis Neno, an matom nok so’it na’ko nai Matius naka’ mese, ela mese talantia ela bo’esam hiut, aim ala kit mana’ nim es nok es ma tak “Shalom.” (Nonot aknino an mana’ nim es nok es)

          An mu’i lasi’ leta mese an matom nok mafutus anbi ume mese. Tabu mese’, anmu’i li’an feto na’ko kuan anao neu tasi bian ma anmepu anbi kot. Anbi kot nane, in ka na’uab nit fa Uab Meto. In anmepu nbi kot funan tenu te, in anfain neu kuan. Maski nak ala funan tenu ha, mas leka’ in anfain neu kuan in an moe’ onle in ka nahinfa Uab Meto. In babaf nem he nkiso neu in Ume, mes in anmo’e onle kanahinfa babaf.  In antoti nek labit nak “Bife mnasi me es le’i ka?”

          A’ leta le’i en matom nok hit monik anbi neno-neno muni’ le’ i. Kalu hit ta tan ai atoti li’an munif neu in amnasit sin, anah muni’ le i anmae he nmanaok in amnasit sin.  Sin ka nahinfa monin in pe’an. Sin ka nahin fa monin in fatan.

          Sulat Knino Beno Alekot neu Batan i, antui nahunun Usif Yesus In monin In pe’an anbi naka’ mese. Matius naka’ mese ela’ mese’ talantia ela’ bo’esam hiut. Kalu hit atso’i anbi uab Meto, nai Matius an tuim’nak mansian le’ nane an mu’i monin in pe’an. Yesus Neno Anan le’nane nai Daud in sufan. Nai Abraham in Sufan.

          Nai Matius anlut anteni nak, na’ko nai Abraham talan tia Yesus neno Anan an mu’i eke-eke, batan-batan talan tia hit Usif Yesus. Anbi Eke-eke ma batan-batan le’i  nai Matius in antui atoni-atoni sin kanan. Kanaf-kanaf onle nai Yehuda, nai Hezron, nai Daud, nai Rehabeam, nai Elyakim ai nai Zadok talantia nai Yusuf, le nane atoni in kanan. Hit oni’ ta tan ai atoit tak nansa es nai Matius kan tui fa atoni-atoni nane sin aonbian le’ bifel sin kanan? Fun atoni mes nabua nok bifel henati si nahonin sufa ka’uf na’ko batan neu batan. Nansa, nai Matius ala antui atoni kanan namfau nesin bife in kanan anbi so’it le’ i?  In sulin nak, natuin an bi tabu le nane, an bi pah Palestina, atoni ma upa anesin bifel. Na’up atoni nesin bifel.

          Mes leka hit atso’i leko-leko, a’an knino an eut kit nak anmu’i bifel nim sin kanan antui anbi so’it  i, an matom nok Yesus Kristus in monin in pe’an. Bifel-bifel le’nane es bi Tamar, bi Rahab, nai Uria in fel, bi Rut, ma bi Maria. Sin bifel nim le sin lalan monit amsa naheun nok sanat ma lima’et. Bi Rahab le’nane bife asanat, natuin in an ma’paisa nok in mone Amaf nai Yehuda. Le’i lasi le’ ka nmatomfa nok Uisneno in lomin. Bi Rahab amsa, nasanab. In le’nane bife amoe lais kake ma ka nmoin na’ko fa nonot Israel pap mese onle bi Rut. Nai Uria in fel kanan bi Batsyeba. In an mafut nok nai Daud ma oke te in Nahonis Usif Salomo. Bi Maria amsa’ bife munif le’ na apu anbi in tabu in fe’ ka nmoinfa on fel ma mone nok nai Yusuf. Sin le’i bifel-bifel le’ naheun nok sanat. Mes antui sin kanan anfani Usif Yesus In amnais unu sin. Nansa anbi tabu le atoni-atoni ma upa nesin bifel, fe an mu’i bifel sin kanan matui anfi so’it le i? Nansa hit Uis Neno an palsai Bifel sin matui anfani in Bat Unu sin?

         

Uis Neno ka nloim fa lasi sanat, mes in anek nis atoni asanat le anlomi he na’baina in monit an matom nok Uis Neno in lomin. Uis Neno manekan neu Atoni ma Bifel nok. In ka nek fa ala atoni ma mainisin bifel? In an nek bifel ma Atoni, natuin bifel ma Atoni le nane in es anmo’e sin he nati nahonis anah-anah ma anmo’e sin anfani amnasit neu sin anah na’ko batan neu batan.

          Hit at mu’i amnasit na’ko batan neu Batan. Hit at mu’i Bat unu’ ma Bat muni. Mes Uis Neno antoit kit he nati ta up hit amnasit sin, onle In na up sin bifel ma Atoni. Meski nak mansian le’i batan neu batan nahenu sanat, mes Uis Neno an manek sin. In ka nmanek fa sanat, mes in an manek mansian asanat le he na’baina.

          Bae benu manekat, hit sanat es le sa, ka? Hit sanat esle hit ka ta up tanfa hit amnasit sin. Leka hit amnasit sin an mo’e lasi le namenab hit nekak, anfani on anah, aim ala kit at manaok sanat es nok es, he nati tanaoba Uisneno in aplenat. Anbi plenat bo’es, Uis Neno nakua a’an nak, “Mi Naeb hi Ama Ma hi Aina he nati hi mipeni ua Alekot ma ua mnanu” (Kel. 20:12). Uis Neno Nokan kit. Amin